東區走廊係香港4號幹線嘅一部份，沿住香港島嘅北面海岸興建，連接銅鑼灣同埋柴灣。全線係三線同部份四線雙程嘅分隔公路，主要係高架道路。車速限制淨係得每小時70公里。

現況
2000年7月，政府喺鰂魚涌同埋太古城一段嘅東區走廊進行改善工程，嚟舒緩往來東區海底隧道嘅交通。工程包括喺海旁加建一條兩線嘅高架橋嚟做去柴灣嘅東行線，原本嘅三線東行就改做兩線通去東區海底隧道，讓出咗一條線改咗做西行。太古城交匯處亦都進行咗改建，加建咗多條嘅行車線，令到鰂魚涌至到西灣河一段嘅東區走廊成為四線雙程。工程喺2003年7月攪掂。