熱帶氣旋（Tropical Cyclone）係一種低氣壓天氣系統，喺熱帶或亞熱帶海域(例如太平洋，北大西洋，印度洋)形成，佢嘅能量自水蒸氣冷卻凝固嗰陣放出嘅潛熱。移動就主要係受到科氏力同其他大尺度天氣系統嘅影響，最終會喺海上消散、轉化做溫帶氣旋或者登陸後喺陸上消散。登陸嘅熱帶氣旋可以造成嚴重嘅財產或者人命傷亡，係由天氣引發嘅天災之一。不過熱帶氣旋亦係大氣循環其中一個組成部分，將熱能由赤道地區帶去高緯度。
熱帶氣旋嘅環流受科氏力影響而圍住中心旋轉。喺北半球，熱帶氣旋沿逆時針方向轉，而喺南半球就順時針咁轉。
喺西北太平洋，一啲比較強嘅熱帶氣旋叫颱風，而喺東北太平洋同北大西洋就叫颶風。廣東話入面，受熱帶氣旋吹襲俗稱打風。