美國，即美利堅合眾國（英文：United States of America，縮寫為U.S.或者U.S.A.‎，或常簡稱為America、United States或者The States，花名 Uncle Sam），以前因為佢嘅國旗嘅花紋而畀人叫做花旗國，係位於北美洲嘅一個國家，北面接壤加拿大，南面接壤墨西哥。首都係華盛頓哥倫比亞特區（Washington, D.C.），最大城市係紐約市（New York City）。依家總統係喬治W布殊。
美國係一個帶民主、分權、制衡傳統嘅聯邦共和國。美國係第二次世界大戰嘅主要戰勝國，所以佢係聯合國安全理事會嘅常任理事國，有權否決議案。
佢嘅起源可以追溯到1776年英屬嘅13塊北美殖民地嘅獨立宣言。由1776年開始響英國統治底下獨立出嚟之後，美國1789年就成為統一嘅聯邦共和國。經過兩百幾年嘅發展，美國已經響經濟、政治同埋軍事實力各方面都好過佢以前嘅宗主國同埋其它任何國家。尤其響蘇聯解體過後，美國已經成為世界上嘅超級大國，而且仲係唯一一個響世界上好多個國家駐紮並且使用軍隊嘅軍事大國。

畀人殖民化之前嘅美國
有理由相信，畀人殖民化之前嘅美國本土既人，好多都係大概喺一萬至五萬年前左右，由亞洲移民過去嘅。佢哋就係我哋今日所講嘅印第安原住民。
畀歐洲人殖民化之前嘅美國早已經有好多文化入咗去，包括西南方嘅阿那薩斯同東面嘅阿登那文化等等。喺呢啲文化當中，有部份係好著重要定居落嚟，同埋要多生子孫嚟作為勞動力。所以早喺公元前二千五百年，美國東部就已經可以靠當地土生嘅太陽花等等，而發展出獨立發展既農業。後來，由墨西哥傳入嘅一啲穀物品種更加有能力適應當地嘅氣候，所以就取代咗本土嘅產品。